الكل معروض ف الإزاز بقلم الشاعر وحيد راغب

(الكل معروض ف الإزاز)
ضِفنى بساحْتَك لو سمحت
واعمل لِى شِير
الألم بيعضِّنى
وفاس الوطن
شقِّ المواجع للعبور
الناى بيطرح غلِّتُه
والعزف بور
فات الزمن
اللى انطحن فيه الشعير
نصف الإله
أسطورة عدَّت وانتهت
لون الشقائق ليه بهت
زمن الأحبة فرفِتُه
نغم الهوان
البحر لَمِّ جُبِّتُه
وخان الرهان
بدرِى قوى
ازاى هانرجع نرتوِى
ف قصور هارون
والريح جرت ف عروقنا
جامحة بالظنون
الضحكة طاطِت للوجع
والنول فرَط غزلُه
الحزين
النهش زاد
والموج طرح
ثمرة عِناد
والكل بافتِى من كيعانه
إن القضية اتأجِّلِت
يوم الميعاد
الكل معروض ف الإزاز
مالِيكان بيبلع
ف الرذاذ
حجاج بيبصُم إنه عادل
والعنادل
ف البوغاز
والمنجنيق هدِّ الحرم
وسلالم القلب العتيق
ليه النفس
شرخ الضلوع مليان حريق
والعين بتمخر فى السما
مجدافها ضيق
صطَّب ونزِّل منهجك
فوق سطح مكتبك الرقيق
الدنيا ليل
والانسجام معتوه بديل
حتى السحر
حطَّم كاسات سمر القبول
والقمر خدَّر أمل
ودعا النسايم للكسل
والنوم طرَد
حلم الصبايا والنخيل
كابوس هجم
والبوح ندم
إنه سكن حرف القِوَالة
هل لسَّة باقى م النخالة
غير حُصْرُمِ الهمِّ الثقيل
الويل ولد
ويلُه بويل
والمخملية صنَّفِت
حملة الشمس العفِيَّة
بالعمالة والضباب
صُفِّ الخجل بعد الوجل
واقفل نوافذ الانتحاب
مش كل نجم ف ليل سحاب
يبقى الطريق
الشك يومه مالوش صيام
عمر الأدان ما كان نهيق
سِد البيبان
واكتم صهيل الامتهان
النهر مهما الصخر باجرى
والنور بروحنا
قبل ما يشُق العيانالشاعر وحيد راغب