اغنيه

سحرتني عيونك *** بقلم السيدابوطاحون
*********
جايبلك م البحر اغاني
اغاني جميله وعجباني
وبترقص ف البر التاني
مش عايز قلبك ينساني
جايبلك م البحر ....
*********
يا جمالك وانتي معدية
ع البحر والموجه عفيه
أنا قلبي بيرقص حواليا
وعيونك ولا تسأل فيا
جايبلك م البحر ....
*********
خوديني ف حضنك خليني
أتملي ف وشك يا عيوني
يتواصل قلبك مع قلبي
ويضمك ويقول ضميني
جايبلك م البحر ....
*********
من همسك يا رحيق الجنة
تتعطر روحي وتتهني
سحرتني عيونك وخدتني
من قلبي للدنيا التانية
جايبلك م البحر ....
*********
الدنيا التانية المليانه
بالحب بيرقص في هوانا
عصافير بتزقزق حوالينا
والورد اتبسم وندانا
جايبلك م البحر ...
*************
#سحرتني_عيونك
#السيدابوطاحون
#الاخنوم

'‏اغنية (خال الجمال)
--------------
ياخال الجمال عا الخد خايل
ياورد الدلال عا الغصن مايل
-----------
يا بدر الندا ياخال
ياحلم إبتدا بموال
ياصوت الندا رحال
يا خال الجمال ياخال
-----------
ياخال الجمال ميل
ابدر غنا ومواويل
ولو يغيب القمر
إعمل لنا ميت ليل
ياخال الجمال ياخال
-----
ياخال الجمال خِلى
يهجرو إيه يفضلى
بعد التعب والسهر
الاقى فين ضلى
ياخال الجمال ياخال
-----
ياخال الوداد إرتاح
اصل العتاب بحراح
غيبه وطول السفر
خلى الامل رواح
ياخال الجمال ياخال
------
ياخال الغرام فين
وداد ياضى العين
قلبى ليه إتقهر
قولى اشوفك فين
ياخال الجمال ياخال
---
ياخال الجمال عا الخد خايل
دا البعد طال والقلب حاير
-----------

خال الجمال (طبع الحسن ) ( نغزه اوحسنه اوشامه)على الخد

((كوتو موتو))

كوتوموتو النوتك والنوتا
ماهى اصل دى ماما امريكا
استاذه فى فن البولوتيكا
تديكا اد ماتديكا
وتغطيكا وتعريكا
وتاخد منك كل ما فيكا
وتسيبك متحاصروحديكا
ماما امريكا. ست الكل
اسلحه كيماويه
اخر فل
خيرها مرشوش ع الكل
والكل لازم يشرب
يشرب كاس العار والذل
امريكا ومين يعاديكى
ويعند ضد التيار
تنقلب الدنيا عليه
ولوحده جوه النار
صدام كان فاكر نفسه
فارس بحصان مغوار
اهو نطح الصخره برأسه
واترمى خلف الاسوار
واهو درس عشان نتعلم
ان العالم امريكا
علشان نركع ونسلم
احنا العرب الانتيكا
مادمنامتعاهدين
ع الفرقه ومتواعدين
والكل ف سكه لوحده
مين راح يعند ويكابر
مين دا اللى هيقدر مين
فين عبد الناصر تانى 
هنشوفه امتى وفين؟،
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بقلم اخى الشاعر المرحوم/,محمدمحمودالشربينى

أغنية (عشرتى انساها) ٢٨/فبراير/٢٠١٧
****************************************
لا تشكينى ولا تبكيلى

خلاص عشرتى انساها

انا اللى سامحت واديتلك

فرص ياما .....وتنساها

معادش ف قلبى يا دنيا

كانت ليا ....... وبهواها

اى مكان ولا .....ذكرى

غير الانات مع ...الاهه

لا تشكينى ولا تبكيلى

خلاص عشرتى انساها

خلاص سيبنى وفارقنى

حياتك دى ما....لازمانى

قسيت ياما وسامحتك

وترجع بردوا من تانى

لطبعك اللى ياما حاولت

اغير فيه ........وبكانى

عشان قلبك مابيحبش

عشان انت ديمه الجانى

خلاص انا قلبى عالجته

وكتر الغدر .......قوانى

فصدقنى ف يوم ما هحن

ولا ح رجع ......فأنسانى

يا حب ضنانى وأسانى

ولا فاكر ف يوم جانى

هواك على قلبى بالراحه

فأنسانى ...... بعنوانى

وسيبنى يا سيدى وفارقنى

حياتك دى ما .... لازمانى

بقلم الشاعر/ محمد الشاذلى

((٠٠رنة وتر٠))((٠٠اغنيه٠٠))

حبيبتى اطهر 
من ملاك
وارق من 
ضى القمر
عيونها بحرين
م الحنان
وجمالها
يفتن الحجر
صوتها كإنه
وتركمان
بيغنى
لليل والسحر
ورموشها
ضلايةامان
من بعدغربه
وطول سفر
أنفاسها
بتدفى القلوب
المليانين
حيره وسهر
حبيبتى
اجمل م الجمال
وارق من
رنة وتر
٠٠٠٠٠٠٠٠٠٠٠٠٠٠
بقلم الشاعر /الشربينى محمودالرفاعى

أوعــــــى تقلــــــق
.................
يا حبيبى .. عدى .. لىّ
لسه فيه فى الرحله باقى
إنت عمرى ونور عنيّه
يا حبيبى .. واشتياقى

إوعى تقلق .. مهما غيبنا
فوق طريق مليان خطوره
النجوم هاتدق بابنا
تحمى روحنا م المراره

الهوى هو اللى خدنا
فوق طريقنا .. م البدايه
عن جسور الليل بعدنا
وابتديت وياك حكايه

يا حبيبى خُدنى ورده
كلمه تهمسها بصوتك
لو جناح الفرقه عدى
مستحيل يهدم حياتك
.....................
عبيــــــر الجنـــــــــــدي

يا حبيبــــى بــــلاش سفــــــر
.......اغنية...................

رمش العيون أسرنا يا هديه م القدر
بتغنى يا أميرنا والقلب ليك وتر
ياما وياك سهرنا فى طريق مليان شجر
وحكينا ليك شعورنا يا حبيبى بلاش سفر


سلمت لك بحورى قدمت لك حياتى
يا حبيبى لك شعورى يا أحلى ذكرياتى
يا بو الطلعه البهيه والنظره المداريّه
ياما وياك سهرنا فى طريق مليان شجر
وحكينا ليك شعورنا يا حبيبى بلاش سفر


أنا إيه من غير عيونك مركب جوه الرياح
بالروح دايما أصونك وأخلى الكون براح
وأجيلك شايله روحى داوى جميع جراحى
ياما وياك سهرنا فى طريق مليان شجر
وحكينا ليك شعورنا يا حبيبى بلاش سفر
...............
عبيــــــــر الجنـــــــــــدي