سلطان الحروف عبد الحليم الزلوعى

سلطان الحروف

منين مطروح انا راضي
تكون الجاني والقاضي
ما أنا المجنون وانا المفتون 
بحرف يجيبني م الماضي
وانا المجنون بحرف النون
ما ضاعش العمر ع الماضي
عشقت الحرف من صغري
ادور فيه عن المجنون

ويوم ما الحرف يتمنع
يكون رافض لاي قانون
ولما في لحظه يسلطن
بيلعب بيه وتر في قانون
وانا المجنون وشيئ عادي
تشوف شاعر وعاش مسكون
يدور عمره عن همزه
ويكعبل في حرف سكون
بيلعن يوم شيطان شعره
ويوم يعشق شيطان ملعون

باحج لكعبة احلامي
والف واطوف علي المضمون
واشد رحالي للمعني
ويطرح كل يوم مية لون
يصور لينا فرع التوت
وادم لسه بيه مفتون
توسوس له الحروف ينسي
عشان يعمر بنسله الكون
نزلنا الارض وبكلمه
وعشنا الشك جوه ظنون

تشاغلني الحروف راكع
ودمعي يغطي كل الكون
وانا ساجد ونفسي اتوب
تلاعبني الحروف بجنون
وانا صابر علي جرحي
بغير الحرف مش راح اكون
ويوم ما السعد بيجيني
الاقي الحرف قلبه حنون
دي آية ربنا في كلمه
يقول للشيئ ده كن فيكون