الملايكة بتبكي بينا بقلم معوض حلمي

قصيدتي( الملايكة بتبكي بينا )
بقلمي وأدائي معوض حلمي شاعر عامية
والتي تحكي عن أطفال الشوارع
 _______________

"" الملايكة بتبكي بينا ""
::::::::::::::::::::::::::::::::::::::::
عايزين نتوب والنيه باين فيها إنا ..
مستحيل ربنا يقبل توبتنا ..
والملايكه بتبكي بينا ..
إزاي نتوب والوش كالح ..
والحزن طارح ف المطارح ..
والحلم سارح للغروب ..
الشحوب على وشي واضح ..
ضحكتي مسروقه مني ..
والألم نايم في جرحي ..
والأنين راسم ملامحي ..
نفسي أصرخ نفسي أحكي ..
ومهما نحكي ومهما نشكي ..
مش هنقدر يوم نعبر ..
عن ألامنا وعن همومنا ..
عن حلم طفل نفسه يفرح ..
نفسه يلبس يوم جديد ..
نفسه يشعر مره إنه
كان ف عيد ..
نفسه يشعر إنه حي ..
إنه عايش مش على الهامش ..
أو عايش رديف ..
لما ياكل لقمته ويروح ينام ..
ينام على فرشته مش ع الرصيف ..
نفسي أسعى ف ضل روحه ..
نفسي أطوف ف رحاب جروحه ..
نفسي أمسح دمعته واداوي خوفه ...
لا أم تحضن لهفته
ولا داق حنانها وحبها ..
ولا ضحكته ،
نامت بشوق على خدها ..
والصبح هل
والجراح على وسعها ..
والهم زاد
والكتاف معدتش شايله حملها ..
والخطوة من كتر الحمول
تعبت وتاهت ف السكك
سكة اللي يروح مالوش تمن ..
وسكة الحلم اللي اتسجن ..
ويجي ليل الشجن
توسع جراح الروح ..
يحلم يروح الألم
ف نوم الأسى والنوح
وعمر نوم الأسى
مايداوي جرح الروح  ..

وعمر نوم الأسى
مايداوي جرح الروح ..
______________
بقلمي ........
معوض حلمي
منشأة بطاش
تمي الأمديد
 دقهلية