^^^^^
راح سافر
و مرجعشي
و ساب الهم متبعثر
و طول الليل ميرحمشي
مبنمشي
أقول الآه تريحني
لكن م الآه تعبت أكتر
ما ودعني
سهرت الليل و لوعني
بشوف خياله يتمخطر
علي جرح و ألم ماشي
و كل خطوة يتاخر
أناجي الطيف و يسمعني
و يوجعني بتنهيدة
لكني أزاي معرفشي
على شط البحر
أشوف صورة
بتضحكلي
و موج البحر يتعكر
من دمعي
و من ألمي
قالوا الصبر يجمعنا
لكن الأمر كان أخطر
كاس الصبر دوبني
و قلبني على كفه
مليان بالمر مش سكر
حضنت الكاس و ضميته
في أيدي الكاس يتكسر
حتى النوم زعل مني
نسيت النوم بقيت أسهر
عشان سافر بعيد عني
و قال البعد متقدر
أحلام الليل بتوهمني
و نور الشمس يتبخر
خاب الليل و خاب ظني
شربت المر و أتكرر
لا كاس الصبر طمني
حتى الطيف ما يتوفر
بشوف الصورة مهزوزة
جوه الليل و تتنكر
^^^^^^^^^^^^
بقلم/ رمضان العلالقة
0 التعليقات: