أوركسترا سيمفونية الشعر

شهرزادي وعيد ميلادي بقلم معوض حلمي

by titodb2000@gmail.com 8:12 ص 0 التعليقات
" شهرزادي وعيد ميلادي "
:: 5 / 4 ::
....................................
:: مقدمة مرحة ::
قومي يالا
ياشهرزادي
شاركيني
فرحة ميلادي ..
زي النهاردة
ف شهر
خمسة
أنا اتولدت ..
كانت الساعة
وخمسة
أو إلا خمسة ..
والله
مش فاكر
باين على كبرت
وعقلي أمسى ..
المهم
إنه بقت
ليا لمسة ..
ولمسة معوض
بهمسه ..
أصل أنا
حساس بجد ..
بحب كل الناس
وزي النسمة ..
وانتوا الورود
اللي تداعب
نسمتي
وتملاها شهد ..
...............................
:: القصيدة ::
قومي يالا
ياشهرزاد ..
مرت سنين
كتير عجاف ..
والقلب شاب
أصبح يخاف ..
لما نيجي
نروح ننام
نخاف ..
ولما نصحى
كمان نخاف ..
بعد اما كنا
قلب واحد ..
ونبض واحد
في الوريد ..
أصبحنا ميت
مليون شريد ..
قومي يالا
ياشهرزادي ..
قومي نادي
ف يوم ميلادي ..
واحيي فينا
الطيبة تاني ..
نادي علينا
لملمينا
علمينا
أدبينا ..
دانتي
ف عيون ربنا
وغالية علينا ..
قومي يالا
ياشهرزاد ..
وانتي أغلى
م الدهب
ومن الماسات ..
وكتافي ليكي
كتف ميه
وكتف زاد ..
قومي يالا
اتذوقي
لفي البلاد ..
وعطريها ..
إفردي شعرك
سحابة
وضلليها ..
خلي نيلك
يجري فيها ..
يحضن سنابل
القمح العفية ..
ويصحي حلمي
الغافي فيا
من سنين ..
قومي يالا
ياشهرزاد ..
مشتاق ومليان
بالحنين ..
مشتاق
أزور السيدة
وسيدنا الحسين ..
والف حبه
ع المقام ..
واتوضا منه
المغفرة ..
واصلي عنده
ركعتين ..
واصلي عنده.. ركعتين..
.................................
معوض حلمي
منشأة بطاش
تمي الأمديد
دقهلية

الكاتب: titodb2000@gmail.com

انا عمرو محمد مدير مدونة عمرو ويب مصمم ومطور قوالب بلوجر لدي خبرة 3 سنين احب ان اضع كل جديد من قوالب في مدونة عمرو ويب وانا مديرها

0 التعليقات:

الاشتراك في: تعليقات الرسالة (Atom)