"إمتحان عربي" بقلم أحمد الجندي

"إمتحان عربي"

دور في المعجم يا صديقي عن حرف الخه
عن كلمة خايب خداع خوان وخسيس
عن كلمة رخم ورخيص في حرف الخه
في حرف الباء عن كلمة باؤوا بالفشل
عن كلمة باشا وباشخولي
عن بكره التايه عن بعده
في حرف القاف تقدر تعرف كلمة قراقوش
في حرف الحه عن حلق عن كلمة حوش
عن لفظ حرامي وحراميه مبيستنوش
عن سلم في حرف السين
واتكلم عن يوم حطين
وبلادك عماله تروح وبتحلم بصلاح الدين
ونيجي لسؤال الإملاء
أكتب ما يملي عليك
أكتب نعمين للشياطين
طاطي للبشاوات واحكي الحكايات
واختم موضوع الإملاء بخنوع وسكوت
وإياك تتكلم وتعلم وتعلي الصوت
في لصوصنا عفوا في نصوصنا
 تكتب بثبات وتكمل باقي الأبيات

إذا الشعب يوما أراد الحياه فلا بد أن يكتفي بالفرار
ولابد أن يستجيب العراق  ولابد أن نحتمي بالكبار

وأكمل إلي قوله فلتعيشوا رجالا عظاما تحبوا الهزار

سؤال البلاغه سؤال الأدب
وليدي الصغير بجهل انضرب
مجازر لأهلي في أرض العرب
ماتبكيش يا وطني وتقول عجب
مين داس فوقينا؟ ومين اتغلب؟
ناس لجل ربك بتوهب حياتها
وناس عايشه ترقص وتشبع طرب
خلاصة الكلام ده تقول الحقيقة
 تجاوب وتكتبلي أيه السبب؟

سؤالك يا قصه ده مين اللي باعنا؟
ومين اللي قدم رقاب الغلابه؟
وميناللي سهل مجي العصابه؟
ومين اللي خلي الأمان يبقي غابه؟

وادي النتيجة محدش مذاكر
ولا حد ذاكر ولا حد كاتب
ده أصل الجماعة تنابلة مكاتب
تعيش القضية تموت القضية
 متفرقش أبدا في عرفك يا راسب

#أحمد__الجندي