(يهِش يبِش يترقَّص) بقلم الشاعر وحيد راغب

(يهِش يبِش يترقَّص)
يجيلك ودمع العين بها انهار
عشان صوتك
ولما الكرسى يجتازه
يلم حقايبه ويفوتك
دموع تماسيح
ما تتصدق
ويزحف ليك كما أفعى وحرباية
بيضحك لك
وقلبه عليك كسنطاية
يهش يبش يترقص
ويطقس
وطرفه الخاين العسعس
يتف عليك
ويرفع إديه يدعى لك
وقلبه حجارة منحوتة
بترجم فيك
ويضغط لما يتلاقى
وسط عامى
على عواطفه
ويرمى البلحة ف جرابه
وبيلاطفه
ولما يحس بمثقف
يدارى لسانه فى بطانته
وينزل زيف
كلام وظروف
وكم ترعة ردمناها
وكم مستشفى وجنينة
وبنت حزينة نسترها
وكان فى بلدنا كم واحد
عواطلية
وكان ف الخمسة ف المية
متين واحد
علجناهم
وبيعدد
كرم منه
مع إنه
فواتيره بيبلفها
ولايسدد
كأنه مايعرف التفسير
وربه ما يقبل الشركة
ولا يهمه سوى العركة
يخطيها بكرسى كبير
ويتحصن عشان بكرة
حقيبته تعدى م التفتيش
ولو بالبودرة والتخدير
سعادته أمير
الشاعر وحيد راغب