يالا نحلم بقلم .. معوض حلمي

( يالا نحلم )

يالا نحلم بالعمار
قلبي للأشواق مدار
ترسميني خط حنة
وأرسمك ورد النهار

يالا نحلم باللي جي
ضل قلبي ليكي في
مدى إيدك طمنيني
لونيني بنور وضي

ليه بنحلم باللي عدى
ظني فيكي جاب وودا
ليه ف ثانية تهجريني
وقلبي باقي ع المودة

يالا نحلم بالمحبة
نبتديها حبه حبه
بخطوة نبدأ ألف ميل
وخطوتك بتزيد محبة

يالا نحلم بالهوى
يجي نتلاقى سوا
سهرانين ويا القمر
فرحانين والليل دوا

لما نحلم بالوما
قلبي وقلبك إنما
محتاجين النية تصفى
لاجل نوصل للسما

يالا نحلم بالسلامة
ياما عشنا سنين ندامة
جرحها عشش ف روحنا
علمت سابت علامة

يالا نحلم بالسعاده
حقنا نحلم زياده
بالفرح نزرع قلوبنا
والسعاده تبقى عاده
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية